GURING

Kanapa mata nih kada mau guring,

Di padahakan garing kada jua garing,

Di padahakan risau kada jua runsing,

Di padahakan bungul kada jua miring.

Tuhuk batilantang bawa bahiring,

Bawa batingharap bawa bajungging,

Bawa maikup si bantal guling,

Bini di higa mangaroh dah guring.

Cengkerik di luar babunyi nyaring,

Sasakali tadangar bunyi gagarinding,

Asa hahayaan kaluku maling,

Dangarakan bujur2 sakalinya kucing.

Kada karasanan wayah bila taguring,

Sayup sayup tadangar kring kring kring,

Sakalinya jam loceng badaring,

Manandakan fajar parak manyingsing.

Napanya lagi jangan bagulang galing,

Lakasi bapuat biar jalan jujurinjing,

Bawa mandi biar sigar tulang karing,

Sambahyang Subuh jangan kapala giling2.

Ulahan: TokNgah Banjar.

FACEBOOK (Edisi Banjar)

FACEBOOK (Edisi Banjar)

Jar urang Facebook sama jua muha buku,

Wadah bahubungan di dunia baru,

Halui ganal anum tuha sunyaan tahu,

Kada kira pangkat gawian sunyaan mau.

Ada nang rajin maantar sasuatu,

Ada nang bamadah balagu lagu,

Ada nang maandak gambar bamutu,

Ada nang maandak gambar palsu,

Ada nang suka nambah kawan baribu ribu,

Ada nang ‘like’ takurihing sipu,

Ada nang saja suka suka marapu,

Ada nang konon nak nambah ilmu,

Ada nang mamandir kada lingu lingu,

Ada nang ahirnya dapat batamu.

Siang malam ada haja nang malahu,

Kada kira masa kada kira waktu,

Ada jua nang bacangol waktu tatantu,

Gawian lain banyak napa manunggu.

Asa rami jua Facebook ni ada,

Banyak kawan jua kulaan sudara,

Kada kira di mana depa bagana,

Kada kira lalakian bibinian sunyaan suka,

Kada kira pangkat anum atawa tuha,

Kada kira malayu, banjar atawa jawa,

Di Facebook jua mamandir bacarita,

Bapinanduan bahulutan maluah rasa.

Amun baFacebook biarlah bapada,

Jangan katalaluan mambuang masa,

Tanggung jawap ka hadrat Allah yang Esa,

Jangan sasakali lalai jangan jua lupa,

Bukan handak manguya pada sasiapa,

Sakadar nasihat hagan sandiri jua,

Amun ada tasalah tagatuk rasa,

Barilaan hajalah sasama kita.

Ulahan; TokNgah Banjar.

PENEROKA (Edisi banjar)

PENEROKA. (Edisi banjar)

Wayah hanyaran dapat sunyaan hingkat

Bangun awal kada sawat manguliat

Datang rokal waktunya tapat

Napa di suruh pegawai sunyaan di rembat

Kada kira gawian ringan ka barat

>>> Taga damini banyak dah kada larat.

Ada nang bapadah kada sihat,

Ada nang kununnya urat tagaliat,

Ada nang kaur kada tapi malihat,

Ada nang hidup bagantung ubat,

Ada nang baranai haja kada basamangat,

Ada ai jua nang bising kaya panjual ubat.

Mana nang rajin bausaha,

Kadida nang susah hidup Peneroka,

Ada baingun kambing lambu wan rusa,

Ada jua nang bakadai atawa baniaga,

Ada jua nang jadi kontrektor bajaya,

Ada nang malabur di KPF banyak kada takira.

Barumah ganal bagana gin salisa,

Ada kurita nyaman babalanja di pasaraya,

Ada jua nang manambahi bini no dua

Bahgia hidup mana nang barwaspada.

Taga,,, kada sunyaan penaroka maju,

Kulir bausaha, bagawi kada tantu,

Dapat duit babalanja malulu,

Ka sarang maksiat tampat di tuju,

No ekor yang di tikam salalu,

Mun kada gin kitab 52 di haru,

Lagi parah mun najis dadah di hidu.

Ni lah gulungan nang kada bailmu.

Bersyukurlah bagana di felda ni batuah,

Felda banyak manulung nang bamasaalah,

Kadida barang dapur di D’Mart ambil hajalah,

Di injaminya duit nak mangganali rumah,

Bamacam macam bantuan di tarima sudah,

Napang lagi fikir fikir, kadida apa susah.

ulahan: TokNgah Banjar.

SELOKA MERDEKA

SELOKA MERDEKA.

31 Ogos hari Merdeka,

Nintu lahirnya Nagara Malaysia,

59 tahun sudah lawasnya,

Di lapas panjajah nang bakuasa.

Bujurkah Malaysia sudah mardeka,

Rakyat Malaysia magun di udaknya,

Serangan pikiran awan minda,

Malalui sosial eletronik media.

Walaupun mardeka kana bajaga jaga,

Pangidar dadah makin barmahajarela,

Masuknya baharaga bajuta juta,

Banyak urang kita nang jadi mangsa.

Bibinian jalang mambari calaka,

Saban malam ditangkap kadada kurangnya,

Di Hotel, dirumah urut barlaluasa,

Amun kada baiman mau haja tagoda.

Hanya satu cara mau diri merdeka,

Dirikan Islam taguhkan ugama,

Tinggikan iman, kuatkan taqwa,

Karjakan sagala napa suruhan NYA,

Tinggalkan sagala napa larangan NYA,

In Sya Allah, dunia akhirat kita MERDEKA.

Ulahan:- TokNgah Banjar. 

INGATAN DI USIA SANJA

Bila usia baparak sanja

Tantunya awak sasain batuha

Mana nang baingat mula tarasa

Cukup juakah amal hagan dibawa.

Basyukurlah magun dibarinya nyawa

Hingkat jua baamal nambahi pahala

Tingallakan sunyaan pakara dosa

Nyawa kita dicabut NYA bila bila masa.

Ada jua nang kada ingat apa apa,

Baamal sambahyang antah kamana,

Siang malam bagawi bakumpul harta,

Kaya handak hidup di dunia salawasannya.

Baingat ingatlah kulaan samua

Hidup di dunia ni cuma samantara

Di alam akhirat akan di hidupkan samula

Di timbang sagala amal baik buruknya,

Di tantukan tampat syurga atawa neraka.

Di sanalah kita kakal salawasannya.

Ulahan: TokNgah Banjar.

SELOKA HUDAH TUHAK

SELOKA HUDAH TUHA.

A’asaan hanyar halam basanding,

Handak bapuat bapaut kadinding,

Halam awak kurung cakading,

Damini lamak kadada ditanding.

Basurah tasasul pakara biasa,

Kada ingat arini sanayan kah salasa,

Gigi paculan makan kada barasa,

Aur ka kalinik sakit di pariksa.

Badiam dirumah dah tinggal badua,

Batitiringan laki bini sasama tuha,

Anak cucu bagawian jauh disana,

Hawai dirumah asa bagana dalam gua.

Bajalan gin ngalih urat dah tagang,

Tangan kabas kada barasa mamagang,

Talajak bagarak mula sakit pinggang,

Takajut awan kucing gin takababang.

Mata hudah jadi kada hawas,

Pandangaran gin kada tapi jalas,

Bahira bakamih kada tapi lawas,

Tuhak yaam kana pang barwas was.

Amun dah sadar awak dah tuha,

Kudrat dah lamah kada baupaya,

Kada payah lagi bagawi baiya,

Kada payah lagi barpoya poya,

Tumpuakan amal ibadat haja,

Basadakah, sambahyang jua puasa,

Bawa kaMakah bahaji disana,

Mudahan Allah manarima maampunkan dosa.

Ulahan:- TokNgah Banjar.